Lied van Oorlog en Vrede*
Teks: Henk Hover, Meziek: Jip Hover
De nachte wore kawd
De nachte wore duuster
de nachte wore einzaam
ich misjde dien gefluuster
ich misjde diene erm
en dien lief ónger de daeke
es ’t leech weurt blif ’t kawd
tót de mörge aan geit braeke
tót de mörge aan geit braeke
oos kaerels móste vechte
oos kaerels wuud van hoes
weer vrouwluuj bleve achter
weer vrouwluuj bleve thoes
Nej kaole väör de stoof
En de blome oppe roete
alles op oos sjouwers ouch
’t hoes, d’n haof, de poete
’t hoes, d’n haof, de poete
inèns woor dao de vrede
inèns woor ’t gedaon
nao veer jaor lamentere
moch geer op hoes aan gaon
De Pruus woor äöverwónne
en de vrede woor ein feit
de väörspood geit weer kómme
noe alles baeter geit
noe alles baeter geit
Refrein:
De sjouwers moge drónger, kiek in de verte gloort ’t leech
in de verte lónktj de welvaart, doezendj kanse dies doe kreegs
doezendj gruuetse perspectieve, griep die kanse, stank noe sterk
ein nuuj waereld lieët zich kieke, doezendj henj weer aan ’t werk
De sjouwers moge drónger, kiek in de verte gloort ’t leech
in de verte lónktj de welvaart, doezendj kanse dies doe kreegs
doezendj gruuetse perspectieve, griep die kanse, stank noe sterk
ein nuuj waereld lieët zich kieke, doezendj henj weer aan ’t werk
ein nuuj waereld lieët zich kieke, doezendj henj weer aan ’t werk
Alledaagse beslommeringen
Teks: Henk Hover, Meziek: Jip Hover
Refrein (canonvorm)
Sjrob de vloer en lap de rame
Boen de muibels tót ze blinke, jaohao
Kaer die viezigheid nao boete,
laot dit poetsleed noe mer klinke
1. Zit de vinsters noe mer aope, papapadapaa
laot die muffe loch nao boete, papapadapaa
laot ’t bèddegood good luchte, papapadapaa
was de vinsters, sop de roete
2. Laot de matteklopper korte mette make mit ‘t staof,
vaeg ’t stuupke väör dien väördäör en sjóffel ouch d’n haof
Was de was weer fris en zuver, druueg ‘m druueg aan einen draod
raek de kezel, ligk de lakes oet, zit de voelnis ane straot
Gosewijn en Kunegonde
Teks: Henk Hover, Meziek: Jip Hover
- ’t Is de leefdje die dök pien duit
Onbereikbaar, soms wuudeweg
twieë jóng minse kome zich taege
veuldje hertstoch deep en oprech
hunne aafkóms wrong zich d’rtösse
leet gein ruumte väör vriejerie
hun verdreet det leet zich koum susse
ein onbereikbaar fantasie - Gosewijn hèltj van Kunegonde
Kunegonde wiltj Gosewijn
roddels dege al flot hun rundje
woorte gefluusterdj vol venijn
Die twieë moogdje zich neet kriege
det pasjdje neet bie hunne standj
want dae grenspaol stuit d’rtösse
Deiltj Guliks en Gelders landj - Leefdje lieët zich toch neet dwinge
in gein käörslief of kersjèt
laot ós van de leefdje zènge
waord väór waor en sjoan couplet
blaos de träöte , de trompötte
zèng ’t hoagste leefdesleed!!!
mer Gosewijn en Kunegonde
Gosewijn en Kunegonde…
Gosewijn en Kunegonde….
zinke weg in hun verdreet
Podcastliedje
Teks: Henk Hover, Meziek: Jip Hover
Lekker effe niks,
gein gezanik en gestrubbel
Geine zeiver ane kop,
in miene eige bubbel
Ich sloet mich effe aaf,
väör kleinstedelijk gezeur.
Lang laeve de Podcast!
Lang laeve de Podcast!
Lang laeve de Podcast!
Dae hèltj mich weg van saaie sleur
Van ‘t Kesje nao de Moer
Teks: Henk Hover, Meziek: Jip Hover
Couplet 1:
Höbs se vraoge? Of höbs se klachte?
Stuit ’t bestömmingsplan dich weer ‘ns inne waeg?
Wils se verboewe? En neet mieë wachte?
Den geuf ’t ambtenieëreapparaat ‘m gaer ein vaeg.
Procedures waere oet de kas gehaoldj
Bezwaorsjrifperiodes vasgestèldj
‘t Vergunningskader weurt al flot bepaoldj
Sloet mer achteraan es ‘t dich neet bevèltj
Refrein:
Van ‘t lokètje nao de balie
Van ‘t Kesje nao de moer
Höbs se neet ‘t goje bunke?
Jao de stuis se weer ein oer.
Want regels det zeen regels
Dao-aan haoje weer ós vas
Van de balie nao’t lokèt
En van ‘t muurke nao de kas
Couplet 2:
Wils se fieëste ? organisere?
Ein groate party, Mit eine DJ oppe Plats?
Krisse de krets, Van parafere?
Is dao ‘t ambtenieëreapparaat
Waat dich gaer mats
Procedures waere oet de kas gehaoldj
Bezwaorsjrifperiodes vasgestèldj
‘t Vergunningskader weurt al flot bepaoldj
Sloet mer achteraan es ‘t dich neet bevèltj
Köstersvènke
Teks: Henk Hover, Meziek: Jip Hover
Ich weit ein plaetske in de Kranebrookse bos
Daohaer noom de pap mich mit es menke
Det plaetske haet ein plekske in mien hert
Det plaetske, det is ‘t Köstersvènke
Det plaetske, det is ‘t Köstersvènke
1.Wo de kwekkert kwaaktj in dae pool zwart wie de nach.
Wo ‘t reet röstig roesj langs ‘t vèn.
Wo de dennebuim zich wege, reikendj roesjend in de wèndj.
Det is ‘t plaetske, dets doe mich goofs es kèndj.
2.Wo weer ‘s wèntjers sjleedje van dae berg hoag wie ein hoes.
Wo weer hutte boewdje in dae dennebos.
Jao ‘t plaetske van mien laeve, wo ich dich oats höb gekös.
Det is Mien plekske, jao dao vènj ich mien rös.
Respec väör maedjes
Teks: Henk Hover, Meziek: Jip Hover
Höb respec, respec väör de maedjes
Want de dames zeen noe ane bäört!
Mieë es fien, klein pupkes, modeplaetjes
Lang genóg op oeterlijk gekäördj
Weer zeen mieë es leef en sjattig
Höbbe vuurwerk in oos prie
Kaerels maaktj uch ane kantj
Kaerels maaktj uch aan ein zie
Waem hej det oats gedach?
Det hej nemes ós gezag…
Vrouwluuj, Vrouwluuj, Vrouwluuj, Vrouwluuj ane mach
Vrouwluuj, Vrouwluuj, Vrouwluuj, Vrouwluuj ane mach
1.Zónger maedjes drejdje alles in ‘t hónderd
Zónger maedjes leep hie alles in de sop
Zónger dames woor d’r ieëlenj en gedónder
Zónger dames stóng de waereld oppe kop
Mit mansluuj niks es ieëlenj
Vrouluuj levere profiet
Waat lieërtj ós de gesjiedenis?
Waat lieërtj ós noe d’n tied?
2.Mit maedjes zeen d’r nörges gein probleme
Mit maedjes äöveral waal aan gedach
Mit vrouwluuj aan ‘t roer en aan de reme
Neet sjoe väör eine stórm van wèndjkrach 8
Mit mansluuj niks es ieëlenj
Vrouluuj levere profiet
Waat lieërtj ós de gesjiedenis?
Waat lieërtj ós noe d’n tied?
Slotlied: Ode aan Ech
Teks: Henk Hover, Meziek: Jip Hover
1. Haoj in ieëre waat weer höbbe
Boew op al waat oats ‘ns woor
Haoj ein oug op de historie
Det fundament, boew dao-op door
Haoj ein oar väör aoj verhaole
Die ich kieër op kieër vertèl
Oos historie die moog straole
Den stuit Ech noats boetespel
Oos historie die moog straole
Den stuit Ech, noats boetespel
2. Het verhaol van Kunegonde
Gosewijn die kreeg ‘t neet
Ein romance zónger weerga
Det verhaol, leefdesverdreet.
Koester kwekkert, koester landjsjap
Zwelg in zweme van mistiek
Es ich wanjel door mien stedje
Dènk ich “waat is ‘t hie sjiek!”
Es ich wanjel door mien stedje
Dènk ich “waat, is ‘t hie sjiek!”
3. Blief mer zènge, gans dien laeve
Bie ein koar of in de doesj
‘t maaktj niks oet woos se vanaaf köms
Van ‘t Hènge of de Boesj
Veul die leefdje deep van bönne
Völ dae baeker tót de randj
Dets se äövertuugdj kèns zènge:
‘ch Höb dich leef mien Echter Landj
Dets se äövertuugdj kèns zènge:
‘ch Höb dich leef, mien Echter Landj
‘t Hede en verlede, sjoere continue langs-ein
lieër ein les oet waat gewaes is en vertèl ’t ederein
want de toekoms liktj hiej väör dich, in dees plaats is ’t neet slech
es dien hert ligk in dit stedje, es dien hert ligk hiej in Ech.
want mien hert ligk in dit stedje, want mien hert ligk hiej in Ech
jao oos hert ligk in dit stedje, jao oos hert ligk hie in Ech